दिव्यांगांच्या शिक्षणासाठी उभारलेल्या कार्याची दखल; दहा लाख रुपयांचा धनादेश देऊन गौरव
पुणे : प्रतिनिधी
दिव्यांगांच्या शिक्षणासाठी प्रतिकूल परिस्थितीवर मात करून शैक्षणिक संस्था उभारणाऱ्या जाई खामकर यांना यंदाचा प्रतिष्ठेचा ‘पुष्पा नथानी पुरस्कार’ प्रदान करण्यात आला. रियलफोर फाउंडेशन व सेवादीप संस्थेचे सर्वेसर्वा दीपक नथानी, उद्योजक डॉ. प्रकाश धोका आणि अभिनेते मकरंद अनासपुरे यांच्या हस्ते दहा लाख रुपयांचा धनादेश देऊन त्यांचा सन्मान करण्यात आला.
रियलफोर फाउंडेशन व सेवादीप संस्थेच्या वतीने दरवर्षी समाजासाठी वैशिष्ट्यपूर्ण आणि उल्लेखनीय कार्य करणाऱ्या व्यक्ती व संस्थांना त्यांच्या सामाजिक योगदानाबद्दल पुरस्कार देऊन गौरविण्यात येते. रियलफोर फाउंडेशन व सेवादीप संस्थेचे सर्वेसर्वा दीपक नथानी यांच्या परिवाराच्या वतीने त्यांच्या मातोश्री पुष्पा नथानी यांच्या स्मृतिप्रीत्यर्थ हा पुरस्कार दिला जातो. यंदा जाई खामकर यांच्या दिव्यांगांसाठीच्या शैक्षणिक व सामाजिक कार्याची दखल घेऊन त्यांची या पुरस्कारासाठी निवड करण्यात आली.
जाई खामकर यांना शालेय जीवनात डॉक्टरांच्या दुर्लक्षामुळे चुकीचे इंजेक्शन दिले गेल्याने कायमचे अंधत्व आले. मात्र, या संकटाने खचून न जाता त्यांनी स्वतःचे जीवन सावरत दिव्यांगांच्या शिक्षणासाठी काम करण्याचा ध्यास घेतला. अनेक अडचणी आणि संघर्षांचा सामना करत त्यांनी टाकळी हाजी (ता. शिरूर, जि. पुणे) येथे मळगंगा अंध-अपंग सेवा संस्थेची स्थापना केली. या संस्थेच्या माध्यमातून दिव्यांग विद्यार्थ्यांसाठी निवासी सुविधा उपलब्ध करून दिल्या. तसेच न्यू व्हिजन कला, वाणिज्य कनिष्ठ व वरिष्ठ महाविद्यालय सुरू करून दिव्यांग विद्यार्थ्यांसाठी उच्च शिक्षणाची दारे खुली केली.
या कार्यासाठी अनेकांनी त्यांना मदतीचा हात दिला. मात्र, दिव्यांगांच्या उच्च शिक्षणाबाबत शासनाचे ठोस धोरण नसल्याने या विद्यार्थ्यांचा उच्च शिक्षणाचा प्रश्न अद्यापही प्रलंबित आहे. प्रतिकूल परिस्थितीत जिद्द, चिकाटी आणि सामाजिक बांधिलकीच्या जोरावर त्यांनी उभे केलेले कार्य लक्षात घेऊन नथानी परिवाराने त्यांचा गौरव केला.
या पुरस्कार सोहळ्यात नाम फाउंडेशनच्या वतीने स्व. नाना पाटेकर, हेल्प ड्राईव्ह फाउंडेशनचे तरुण मिश्रा, दिव्या फाउंडेशनचे अशोक काकडे, पूर्णम इको व्हिजन फाउंडेशनचे डॉ. राजेंद्र मानेरीकर तसेच जनजागृती सामाजिक युवा प्रतिष्ठानचे शरदचंद्र आढाव यांनाही ‘पुष्पा नथानी पुरस्कार’ प्रदान करून सन्मानित करण्यात आले.
गुरुवारी (दि. ५ नोव्हेंबर २०२६) पुण्यातील कल्याणीनगर येथील माणिकचंद स्कायवनच्या १४ व्या मजल्यावर हा पुरस्कार सोहळा पार पडला. यावेळी नथानी परिवारातील सर्व सदस्य तसेच कर्मचारीवृंद मोठ्या संख्येने उपस्थित होते. कार्यक्रमाचे सूत्रसंचालन सीएसआर विभागाचे प्रमुख नितीन घोडके यांनी केले, तर सिद्धी वाघ यांनी आभार मानले.
