शिरूर दि. १२ ( अरुणकुमार मोटे) । शिरूर तालुक्यातील कवठे यमाई पंचायत समिती गण हा महिला सर्वसाधारण प्रवर्गासाठी राखीव असून २०२६ मध्ये होणाऱ्या पंचायत समिती निवडणुकीकडे संपूर्ण तालुक्याचे लक्ष लागून राहिले आहे. या पार्श्वभूमीवर राष्ट्रवादी काँग्रेस (अजित पवार गट) यांनी आपला अधिकृत उमेदवार जाहीर केला असला, तरी इतर कोणत्याही राजकीय पक्षांकडून अद्याप उमेदवारीची घोषणा झालेली नाही. त्यामुळे राजकीय वातावरणात उत्सुकता आणि संभ्रम निर्माण झाला आहे.
दरम्यान, सविंदणे गावच्या विद्यमान सरपंच मनीषाताई दत्तात्रय नरवडे यांनी कवठे यमाई पंचायत समिती गणातून निवडणूक लढवावी, अशी जोरदार आणि सर्वपक्षीय मागणी ग्रामस्थांकडून पुढे येत आहे. विशेष म्हणजे ही मागणी कोणत्याही एका पक्षापुरती मर्यादित न राहता विविध राजकीय विचारधारांच्या नागरिकांकडून एकमुखाने होत आहे, ही बाब राजकीयदृष्ट्या अत्यंत महत्त्वाची मानली जात आहे.
सविंदणे गावाला टाकळी हाजी जिल्हा परिषद गट तसेच कवठे यमाई पंचायत समिती गणातून आजवर कधीही प्रतिनिधित्व मिळालेले नाही. गेल्या अनेक वर्षांपासून हे गाव विकासाच्या मुख्य प्रवाहापासून काहीसे दूर राहिले असून रस्ते, पाणीपुरवठा, आरोग्य सुविधा, शिक्षण व दळणवळण यासारख्या मूलभूत प्रश्नांकडे वारंवार दुर्लक्ष झाले आहे. त्यामुळे “यावेळी तरी आपल्या गावाला संधी मिळावी”, अशी भावना ग्रामस्थांमध्ये तीव्र झाली आहे. मनीषाताई नरवडे या गेल्या काही वर्षांपासून सरपंचपदाच्या माध्यमातून गावाच्या विकासासाठी सातत्याने प्रयत्नशील आहेत. अंतर्गत रस्त्यांचे काम, पाणीपुरवठा सुधारणा, महिलांच्या स्वयंसहायता गटांचे सक्षमीकरण, स्वच्छता अभियान, अंगणवाडी व शाळा सुविधा सुधारणा अशा विविध उपक्रमांत त्यांचा सक्रिय सहभाग राहिला आहे. त्यामुळे त्या केवळ प्रशासकीय दृष्ट्या सक्षमच नव्हे तर सामाजिकदृष्ट्याही विश्वासार्ह नेतृत्व म्हणून ओळखल्या जात आहेत.
यामुळेच “अनुभव, कामाची तळमळ आणि सर्वसामान्यांशी असलेला थेट संपर्क लक्षात घेता सौ. नरवडे यांना संधी मिळणे ही काळाची गरज आहे,” असे मत अनेक ज्येष्ठ नागरिक, महिला बचत गट प्रतिनिधी, युवक मंडळे आणि सामाजिक कार्यकर्ते व्यक्त करत आहेत.
ग्रामस्थांनी स्पष्ट शब्दांत सांगितले की, “वर्षानुवर्षे दुर्लक्षित राहिलेल्या सविंदणे गावासाठी ही निवडणूक निर्णायक आहे. यावेळी जर गावातून प्रतिनिधी निवडून आला नाही, तर पुढील अनेक वर्षे पुन्हा अशी संधी मिळणे कठीण होईल. त्यामुळे सर्व पक्षांनी राजकीय मतभेद बाजूला ठेवून सविंदणे गावाला न्याय द्यावा.”
या सर्व पार्श्वभूमीवर येत्या काही दिवसांत इतर पक्ष कोणाला उमेदवारी देतात, मनीषाताई नरवडे या उमेदवारी स्वीकारतात का आणि या गणातील राजकीय समीकरणे कोणत्या दिशेने वळतात, याकडे संपूर्ण शिरूर तालुक्याचे लक्ष लागून राहिले आहे. एकंदरीतच, “वर्षानुवर्षांची उपेक्षा संपवायची असेल तर सविंदणे गावाला प्रतिनिधित्व द्यायलाच हवे”, अशी ठाम आणि एकमुखी भावना सध्या जनमानसात उमटताना दिसत आहे.
